經過尋日一輪瘋搶 iPhone 6s / 6s Plus 之後,先達名人 Lo 哥睇淡,小炒王又點睇?佢第一句就同小記講:「我好後悔!」

後悔訂得太少

嘩!聽倒呢句真心滴汗,小記想拿拿聲做完訪問收線去 cut 單!但係佢之後一句係:「後悔無狂落單!」小炒王話:「我訂到 7 點幾就收手,因為食咗感冒藥太眼訓,點知凌晨訓醒已經無得再加單。」

from: http://www.appletrade.net

自 Cut?不如驚 Apple Cut 你單!

小記問到好多人都自 cut,連 Lo 哥都睇淡後市話無得炒,小炒王話:「首先,要睇你覺得有無得炒嘅定義係乜先,有啲人覺得賺幾千先叫做有得炒,有啲就覺得賺幾百都叫做有得炒!好似我咁訂,如果出倒 100 部俾我,每部賺 $500 即係 total 賺 5 萬幾以上,等於公司出 Bonus 啦!」

小炒王續指:「Apple 確認訂單會 send email 俾大家,一般訂完機 48 小時內有,但我今次用盡之前講嘅防 cut 單絕技,都唔超過 25% 訂單收倒 email,Apple Check 單似乎仲嚴過上年!我自 cut?我驚 Apple Cut 我單多啲囉!」

內地供貨堅充足?

再問小炒王,內地 Apple Online Store 到呢個 moment 都有得訂 iPhone 6s / 6s Plus,就連玫瑰金都有貨,真係唔驚咩?小炒王話:「港版始終平一截,加上唔少內地用戶喜歡港版多過內地版,仲有嘅係內地 Apple Online Store,都有限量購買的!上年炒 iPhone 6 / 6 Plus 嘅時候,內地 10 月 17 日首賣,竟然係帶動港行回收價上升!」

小炒王:量力而為

小炒王向小記大派定心丸嘅同時,都講返句:「始終炒機無話係必賺,如果怕輸,起初何必撳爛 F5 搶購?對我而言,iPhone 嘅投資風險係好低,起碼有 Apple 退貨保證最多輸 15%,其實先達回收價,響真正炒完嘅任買時期,都好少輸得多過 10%,穩陣過唔少股票!」

小記又問小炒王,我一落完單就收倒銀行發出 SMS,話我完成 $12,776 網上交易,但出貨期係 10 月尾,咁我咪未到貨,先找數?小炒王就話:「非也,該 SMS 只係代表 Apple 試 Hold 數,睇下你張信用卡係咪有咁多 credit limit 可以買機,至於實際過數其實係響出貨日,所以唔會出現未到貨,先找數嘅情況。」


  
  
按以下按鈕下載香港二手買賣APP
我們是一個香港免費二手買賣交易APP,超簡單易用,買賣分類超齊全!!
下載我們最新Android App